مـوجوعــــــة على تونس

"الشعب يريد إسقاط النظام"

الشعب عمرو لخمم في النظام, الشعب يحب يعيش, يحب حرية و كرامة وطنية, وزير يتعين رئيس يتكرم ميهمناش, المهم شغل حرية و كرامة وطنية.. الشعب يحب يرقد و ميفيقش على الموت نهار عيد..

الفرحة يغتالها الموت, نهار عيد الجمهورية و الاعلام مزينة قلوبنا و الأبيض و الأحمر يرسم في السلام و الثورة و يصنع في مزيج يحلي الأيام و يداوي الجروح, نصبحوا على إغتيال..

و يغتالنا السواد و تُعلن كل الجروح الحداد.. لكن خسارة شعبنا نساي.. نسى شهداء الثورة و بعدهم بلعيد و باش يخلط لبراهمي..

بالك في بالكم نسيت نهار إلي أعدموا فيه صدام صباح عيد فقنا نبكيو و رغم صغري عرفتها خيانة قومية و بهامة شعبية.. 

علاش قدرنا الخيانات و الإغتيالات و الموت معشش في ثنايا حبنا لبلادنا.. علمونا في المكتب إنو أحمر العلم هو دم الشهداء, قدرنا إنوا نقعدوا نسقيو في العلم بدم شهيد ورى شهيد؟؟؟؟ باش نحافظوا على لبلاد؟؟؟؟..

علاش بلادنا متهديلنا كان الموت, منجمش ننسى و منجمش نصالح..

منيش ملايكة باش نسامح.. 

نحب حق الشهيد و إلي إغتالوا فرحة الشعب و يتم صغار و هبط دموع مرى لازم يتحاسب

و في مشنقة قدام عنينا يتصلب 

يمكن إلي في قلوبنا يبرد, يمكن نجموا نسامحوا.. 

نحب نبكي و زعمة لبكى ينسي؟؟؟

نحب نبكي على بلادي إلي بلاتني بجروح متدواش 

نحب نبكي..

نحب نبكي على بلادي, إلي ردتني من طفلة تكتب في كلام الحب و الدعوة لقيم الإنسانية لإنسان يلوج على الإنتقام.. لا تسامح و لا حب و لا وحدة إنسانية.. كان كره لجرذان الإنسانية 

 نحب نبكي على بلادي, إلي على خاترها لبست السروال و نحيت روبتي باش نجم نجري و نهرب من ريحت الموت و ظلام الرجعية..

نحب نبكي على بلادي, إلي شبعت إغتيالات في موسم المهرجنات..

نحب نبكي على بلادي إلي خلاتني نفهم سياسة بصيف رغم إلي ها لقلم مش متاعي و ريقو ميحلاليش..

أما خسارة شعبنا نساي..

و شهر و الدم يتغسل بكلام لبلاتوات و دموع اليتامى و حرقة الأرامل تتدفن في قبر اللامبالات..

خسارة في بلادي ارخص حاجة الإنسان

خسارة شعبنا نساي...