منامة الصباح

فقت عقاب ليل كيف العادة بعد ساعات من الكوابيس و حليت نكنكتي هاربة من القلق قلت نعدي الوقت لين يطلع الصباح و يغيب الخوف و البرد و 

الظلام.. مستحيل نلقى شكون يهديلي الأمان في الليل  و يقلي متخافش, حضني يلمك و ذراعي يقويك و ميقواش عليك و كي نفيق مفجوعة يغطيني و يدفيني و ينسيني.. قلبي مش طالب غير الأمان و الإحتواء كي تفيض الهموم..

سهرت لين طلع الصباح قلت نحط راسي نرتاح قبل ميبدى تعب الدار و خنار النهار.. حطيت راسي, منعرش رقدت ياسر ولا شوية حليت عنيا  على صوت امي و بابا يفيقوا فيا لفطور الصباح, الشمس دغدغلي في سقيا من الشباك و نسمة بحر خفيفة تنفخلي في وجهي.. مممم محلاه النهار أول مرة نفيق مرتاحة من النوم و أعصابي هادية و البسمة مالية وجهى ترسم في امل جديد.. 

أمي تضحك و تبتسم و تقلي طابع و لا طابعين :)  "باش نحطلك طابعين سكر يحليلك النهار" مع بسمة و هي فرحانة مهيش منرفزة من خويا إلي محبش يفيق و مهيش تجري ورى بويا تحظرلوا في روحوا للخدمة.. و بابا يشرب في قهوةُ و يقرى في كتاب و يقلي بنتي لازم تقراه روعة, مش نرمال بابا إلي لكتب بالنسبة ليه ديكور يزين بيهم مكتبة الدار باش كي يجيونا ضيوف يقولوا عايلة متثقفة تباركلا ولاّ يقرى في كتب, مش مهم التغيير المهم تغيّر.. أختي حطت غنى الشيخ إمام و قعدت معانا في طاولة لفطور, غريبة ياخي أختي تسمع لغنى, مش حرام, مش مهم, المهم توا حلتلي الشيخ إيمام و نسمع في "شيد قصور" شربت قهوتي و مشيت لبيتي نحضر في ساكي للخروج.. ناقز تلفوني, هزيت:

- صباح الحب يا نوارت حياتي

دخت شكون يقلي صباح الحب عاودت غزرت في التلفون نلقاه "حبيبي", من وقتاش عندي حبيب 

☺ مش مهم, المهم عندي شكون يقلي صباح الحب تبسمت و رجعت التلفون في وذني سئلني على فطور الصباح وبرنامج النهار و لبست الخرجة و .. و .. و ...و... 

فرحت, ولى عندي شكون يسألني على تفاصيلي و يدفيني كل  صباح بكلمة حلوة و يدقق في العلة و بنت علة مش تنسنين أما حب و خوف و حماية ليا..

حليت الأخبار لا سلفية و لا دم و لا حروب و لا موت و لا ثورات و لا أزمة إقتصاد.. فمى كان الاخبار الثقافية  و المنتديات و الإختراعات المفيدة للإنسانية.. غريبة, أما مش مهم, المهم فرحانة و قلبي صافي و سما عندها لون جديد صافي و نظيف لا تلوث و لا طقص مفرعس و لا إحتباس حراري.. محلاها الدنيا اليوم.. زعمة كان اليوم ولاّ باش تقعد هكا كل يوم...

أني هكاكة و نسمع في صوت عياط و عرك بين زوز نسا, أم و بنتها, حليت عنيا نلقاها جارتنا كيف العادة تتعارك هي و بنتها تسمع فيها في الكلام, كنت نحلم في حلمة مزيانة, و فقت على الواقع لمريض.. 

البارح كي فقت عقاب ليل تحققتلي أمنية من اميات حياتي, إني نلقى شكون يعدي معايا الليل لين يطلع الصباح و يطمني و يطبطب عليا.. أمانياتي الكل بسيطة و هاي تحققت امنية.. علاش ميتحققش الباقي؟؟؟ مانيش طالبة شيء كان هدوء و بسمة و سلام و امل ♥