العنوان لجلب الأنظار نحبها منغير عنوان

يطوال ليلها و تتكيّف

يتهد حيلها و تتجيّف 

تطيح و تكثر سكاكنها.. 

مش متشائمة اما حكاية لائمة.. 

مرى في بلاد الذكورة 

مأنث متحبش تتذكر..

متحبش تتذكر ليلة إغتصابها 

ليلة بكاها في محرابها 

ليلة ميّةْ بلا قبر, بلا جنازة و بلا عزاء

عزاء فوق راسها, في قلبها و في دعستها,

في لمستها لواقع محسش بدمعتها..

دمعتها غالية.. غالية.. حتى للخبز مش شارية

متقليش أغزر لنصف الكاس المعبي

نحب نغزر للطفل إلي دمعتو ناشفة, كاسو فارغ و ريقو شايح..

منحبش نتفكر إلي أنا ممكن نشبع.. نحب نحس بإلي كاسو فارغ..

مفماش نصف معبي و نصف فارغ..

فمى نصف جيعان, عريان, عطشان و منسي..

مفماش حواء و أدام

فمى أسطورة بناها شبعان عمرو ميركع

عبى كاسو من الكيسان إلي قاعدة تفرغ.. 

فمى أنا و إنت.. 

فمى وجيعة و توأها الأمل 

فمى حياة و توأمها الألم 

فمى حواء و آدم 

فمى إستمرار و محركو القرار

فمى حواء و توأمها الألم 

فمى مقاومة و توأمها الأمل 

آدم مش في حساباتي.. 

مفماش آدم 

فمى أنانية لا تشبع

فمى كاس قاعد يتعبى و آخر قاعد يفرغ 

في ها الجملة نزيد نمعس ال"سي قارو" بين صوابعي و نلعن الخرافة 

و نزيد نسب التاريخ و طسيلة المنتصر إلي كتب التاريخ المغتصب و نزيد نربرب على جد والدين الرأسمالي المحتكر 

و تفوه و تفووووووه على العقلياة الراكعة.. المزكيتهم  بنجازتهم و على طهارتنا قاضية..

و يطول ليلها و تتكيّف و يتهد حيلها و تتجيّف و حواء و آدام صنعتهم الخرافة و مد حياتهم التاريخ و زاد في طغيانهم العقليات الراكعة 

و راسك صاحبتي دمعتك غالية و إنت الكاس بكلوا مهمى من ماه كبوا.. إنت الكاس و دمعتك تعبيه و تزيد تكبوا.. إنت التاريخ و الآلهة و تبا للخرافة.. 

الإهداء للحلمات إلي كيف حلمتي.. الإهداء للصدفة إلي لمتنا.. الإهداء لصدقاتي ضحى و رحاب..لأن وسائل الإنتحار أيضا غير متاحة لمن هم في بأسنا لذلك نقاوم..