دم و شرف

شرف بالدم تكتب..

على البدن ذاب و بين الأفخاذ غاب..

شرف بالدمع ترسم..

على الحروف تسكب و ورى الحديد تحبس..

شرف ربكم شرف..

شرف خايخ ساسو مكسر و طايح..

شرف كيف أفكاركم نفاق، كيف أطفالكم لقطاء نقابكم..

كيف عرسكم زنى و زناكم حلم مسروق من نفاقكم..

و كيما قال المجنون في هاك الثورة "كيف يموت الشرف يموت العار"

مجنونكم مات و تتدفن تحت اهمالكم..

كلامو توا تفهم، حضورو توا كمل..

ضاع شرفكم و تعرى نفاقكم..

تلوح كلامكم..

تنسى و هو عاش و مات سوس أفكاركم..

عاش المجنون عاش فكرو الي بالصدق مرصوص..

ثوري فالثورة أنثى.. ثوري و نحي حجابك..

سيب شعرك خلي تلعب بيه الريح لين تطيح..

طيح و قوم.. تجرح و تعلم..

الشرف مش بين الأفخاذ، مش تحت الحجاب،

مش وسط حبس أفكارهم..

ثوري فالثورة أنثى، ثوري فالولادة أنثى و الإله في آخر المشوار زاد التاء و في حضن التأنيث تخبى..

ثوري و ألعني أول رسالة و أول مؤرخ نسى و ممكن تناسى يدون انك آلهة..

ثوري، أرسمي بنضالك رسالة على حيوط مدينة لقديمة، الشرف مش بحبسي وسط حيوطها، الشرف مش بقتلي على عيون زنوسها،

مش بذبحي و دمعي ليلة فرحي..

شرفي في عقلي يهمني وحدي..

الرجلة تصنع شرفك وحدك مش بقتلي..

شرف ربكم شرف و كيف يموت الشرف يموت العار

و نزل الستار..