تخلويضة.

خسارة صاحب و موت إنسان

و قماش أكحل معلق في كل مكان..

هذيان.. و دوخة خفيفة بعد كل ذكرى

و وجيعة موجودة في كل زمان و في كل مكان.. 

هذيان..  هذيان..

عمى ألوان, الرمادي طاغي على كل الأحلام..

الذكريات الباهية ولات رماد..

منهم الحب لقديم و الرحلة لولة مع الأحباب..

روبة الصغرة تلوحت معادش على قياسها.. الطول زاد و الصدر بان..

نضج و مسؤوليات و أحلام غرقتها في الأوهام.. 

في كل تركينة قبر و على كل قبر جرح و دموع و جنازة و أسود مزين ليام..

هذيان.. هذيان..

عرس يتوج أحزانها و حلم لبنات الكل ولا بنسبة ليها كابوس..

و راجل متعوس باش يعيش مع شبه إنسان

بدن بارد و جنس مصنّع و إغتصاب حلال..

هذيان.. 

غربة في بلادها و وحدة وسط ناسها..

يد ممدودة في وسط الظلام تلوج على الأمان..

و سقين تحت لغطا تفك في الرباط تحب تسير و تطير..

الحرية مهيش هدية..

الحرية لون أحمر في وسط عمى الألوان..

الحرية وقفة و قوة و عياط و تكسير كل إلي كان 

هذيان.. هذيان..