الطيران سبيل و ليس محال...

الإستقرار.. حلم ربما.. أو قرار..

دار.. راجل ربما..و كمشة صغار..

ممكن زادة أربعة حيوط و قلوب تحبك و زادة قرار 

في لحظة صدق مع روحك..

تعرف إلي لحيوط حب و الدار ربطيّة

الراجل قرار.. خيار ولا ممكن إختيار 

عبودية زادة كان باش تخمم فيها أبدية 

و الصغار مسؤولية و حتميّة و حبس ولاّ ممكن محميّة..

تخدم باش تعيش و تاكل و ممكن.. و كيما قلت ممكن تربي الريش

أما تقعد عبوديّة..

عمرك ترهنوا بشهريّة..

أمك و بوك.. تسميهم حب غير مشروط؟؟

إنت زادة مشروع ليهم..

إستمرار ليك بيهم و إسقاط لأحلامهم فيك و كل شيء مردود عليهم

أنا..

أنا.. من أنا؟؟ 

عبدة لهذا و هذاكة.. عبدة لعرفي على الشهرية 

و حتى مشاريع الإستقرار إلي ماشية فيهم بالنيّة

عادي تاقف على رموش عينيك من التعب و تقول:

"سأصير يوما ما أريد؟؟"

و تتسائل بعدمية 

"ماذا أريد ان اصير؟؟"

نحب نطير..

أي حلمي نطير..

منيش ملايكة و ممكن تنبتلي جناحين 

منيش عباش بن فرناس 

من نفوق جبل نرمي روحي و نستنى روحي نطير 

نعرف جناحين من ريش مش ممكن يطيروني كان للحضيض..

للقاع..

و كيما تعرف صاحبي القاع إزدحام.. زحمة..

و ممكن تولي في وسط القطيع لحمة 

و تضيع الحلمة..

أنا نحب نطير

نخمم كيفاش السحاب هو إلي يهبط حد ساقيا 

كيفاش يكسر الأغلال 

كيفاش نوصل للحريّة 

لا نبيع عمري لعرفي خاتر الشهريّة

لا نبيع أحلامي خاتر الحماية و لا نحبس روحي في محميّة

نحب نطير 

حلمي نسير.. نتحرر منغير منحير

منغير منحير من غَدِي

منغير منحير في أَمسِي 

منغير منتفكر حبي لقديم و نتنهد مع وجيعة قلبِي

سأصير يوما ما أريد 

سأطير ..