تــسائلات طفولية

-  الحب ألم و دمار, علاش نغامر و نحب؟؟

- يا متشائمة, منين تجيب فيها الأفكارك هذه, الحب حياة,الحب أمل و سكن و عنوان

الحب حياة!!! بربي كيفاش..الحب حالة مرضية لا أكثر و لا أقل.. غيرة و حيرة.. و بكى و دموع في ليالي حزينة

جارتنا إلي عياطاتها قبب و دمعتها تصب عرست عن حب.. و بنت عمتي علاش بايرة لتو كان مش الحب و صاحبتي إلي في عنية لمرى لقوية إلي دمعتها غالية و صعيبة علاش تبكي ليل و نهار.. كيفاش تقلي الحب أمل و عنوان و سكن, و أنا نرى فيهم الكل مشردين حزانى ممرمدين..

كيفاش تحبني ناثق في الحب و أغلب إلي نعرفهم كاويهم الحب و شاويهم.. 

منجمش نغزرلها المغبونة, سارحة بعينيها في دنيا أخرى من الوجاية, وين الحلم ضايع و القلب بايع, حاضرة ببدنها و هايمة في  عمرها.. تلوج على أمل و تتأمل في شظايا متحبش تتلم.. يا ويلها تبيع يا ويلها تصبر و تضيع.. تعرف الدموع مش حل أما مفاش بديل و مفماش دواء شافي لقلب مليع و مريض.. هذا هو الحب وين نعيش , وجيعة, كيفاش تحبني يولي عندي أمل و نجرب و نحب و ننعيش..

لا لا حبكم هذا ميواتنيش, نحب بمخي, هو إلي يحميني و كي نتجرح يداويني, الإنكسار منجموش و ضعف الشوق منحترفوش, منحبش نضيع عمري بين الآه و التنهيدة.. دموع الضعف في الحب قانون, و وجيعة الوِحش دستور.. كيفاش نبني حياة, الدمع قانونها و الوجع دستورها.. علاش الحب و شنوة لازمتوا و شنوة فايدتوا.. كان مش باش يقدم بيا القدام و نبني بيه دنيا الاحلام..

منيش متشائمة أما الواقع مر.. سنين و حفر بين القلب و الواقع..

الحب مهوش هدية قدر, الحب لغم في ثنايات حياتنا تحفر و تردم..

كان تفجر عليك مشيت اشلاء و بقايا مستحيل تتلم و ترجع كيما السابق و الحُلم..

نعاود نقول منيش متشائمة لكن التجربة أثبتت إنو الواقع مر و الحب وردة شكوها قاتل, شوكها مناجل عطشانة لدم و يا ويل إلي داخل يقطفها بلا خبرة, بلا تجربة و بلا عقل.. تجرحو و بالدم تغموا.. 

كان تحب تحب, أنسى إلي قريتوا في الكتب.. الحب حرب محتاجة سلاحاتك الكل.. العقل و الصبر و التفائل و الامل.. ساحة الحرب مترحمش و الوجيعة مترأفش.. 

منيش متشائمة أما الواقع مر...