لا تصالح

كل صباح نفيقوا على نواح.. 

نفيقوا على كذب و غدر وسرقة و نهب..

نفيقوا على بلاد متكرم كان لكلاب..

تعطيهم و كان لزم فوق لكراسي تراسيهم.. 

و أنا..  

و أنا.. بنتك يا بلاد الهم.. بنتك إلى بكيت عليك الدم 

و من صغري رسمتك في قلبي أسرار و توجتك بالهلال ليل و نهار 

ضويتك بالنجمة الحمرة..

جمرة نفخت عليها من روحي و ضويتها بنوحي..

ضيعتني و في شارع الثورة شردتني

و تناسيتني و في حقوقي نسيتني..

اما هوما حبوك زرقة بالنون و شعارات ترسم من الكذب فنون..

نون النهضة إلى سكنتنا الوجيعة منغير قانون.. 

شكري و براهمي و نزار و جنودنا لحرار.. 

جرحهم لتوا ينزف و دمهم من تحت التراب سايل أنهار..

و ضميرنا..

ضميرنا في الدمعة يرشف

سكتوه بكموه و باللقمة لهوه..

و قلوب الناس لحرار عملت عين رات و عين طزوها بالنار..

رش و ألغام و فساد و برشا كلاب عملوهم أبطال..

أما خسارة يا بلادي شعبك نساي... 

ذاكرتُو كسكاس.. و بكمشة أوراق سامح و صالح.. 

يا بلادي..

يابلادي, ريتهم فرحانين بحروف ملغمة ببرشا فساد و خوف و إرهاب..

يا بلادي يصنعوا في دستور باش يحمي الإنسان..

و تحتو برشا قبور و رصاص في قلوب الأشراف..

"لاتصالح و لو منحوك الذهب.. لا تصالح و لو قيل رأس برأس أكل الرؤوس سواء" أمل دنقل بالتصرف 

تصرفوا فينا و بأرخص الأسوام سلموا فينا.. 

لولين إستعبدونا و الثانين لأمريكا و قطر باعونا..  

الشوكة إلى في طريقهم وقفت و في حلوقهم سكنت..

قلعوها و في الجلاز سكنوها..

يا بلادي, منيش باش نسامح و منيش باش نصالح.. 

و حتى كان نسيت حروفي تفيقني و غدرهم تذكرني..

حرفي يا بلاد غضبانة عليهم و للممات باش يقعد يعاديهم..

لا تصالح و لو منحوك الذهب