مع كل موجة ذكرى.. و مع كل ذكرى موت

مروحة من عند الطبيب.. كانت ماشية ديراكت لدار و بطلت في شطر الثنية قررت إنها تمشي لبلاصطها إلي ترتاح فيها قدام لبحر.. سارحة مش تسمع في شيء و كلام طبيب يتعاود في مخها مرة ورا مرة.. ورا مرة..
مزالت مش مصدقة.. مش مستوعبة شي..
قعدت قدام لبحر تتأمل في الموج يتلاطخ و ينتحر على الشط..

الموجة لولة: طفلة صغيرة بريئة تحب رومنسية جبران و تتعلم في التمرد من قصائد نزار, شعرها ظفيرة على جنب و حميرها تحتو بالسرقة من الحشمة.. حبتو برشا, ولا الاصح حبت تصويرة الراجل الكامل إلي رسمتها في مخها ببرائتها.. عدات مراهقتها و هي تتزين على امل تشوفو بالصدفة في الشارع و تعيش على أمل نهار من نهاارات يفيق يلقى روحو يحبها ولا على الاقل تلقى واحد يشبهلو تحبو و يحبها و تعيش معاه كل أحلامها و رومنسيتها و طيبتها..

الموجة الثانية:الطفلة الصغيرة ولات مرا و الظفيرة تحلت و الحمير بان و الانوثة كملت.. كبرت و كبر معاها حبها ليه و صبرها و املها في نهار يحبها فيه..

الموجة الثالثة: البنية ملت من وحشها ليه إلي ميوفاش و خيالو إلي ميسبهاش.. نفضت السلبية عليها و قررت باش  تربح حبو مهما صار.. قعدت و خممت و خططت باش تربحو.. حكمت التخطيط و عقدت العزم باش تربح معركتها الأولى مع القدر إما الحب ولاّ اللاحب و تواجه النسيان بالنسيان..

الموجة الرابعة: عملت نومرو جديد و كلمتو, متذكرش صوتها, متذكرش إسمها, تخوبثت عليه و عرفت كيفاش تدخلو و من تليفون ولا روندفو و قهوة حتى وجها نساه كينو معرفهاش في عمر لخمستاش ها 3 سنين قداش بدلوها و بدلوه و نسوه فيهاا و نساوه حتى في وجودها، قاعد يتعرف عليها من جديد..

 هي, هي إلي عاشت سنين على خيالو و صوتو.. و منساتش أدق تفصيلو.. ومنساتش أش يحب و أش يكره...

رجعت في حياتو و حاولت باش تحت بصمتها في حاضرو و علاش لا مستقبلو..

الموجة الرابعة: حبها و كيفاش ميحبهاش و هي حلم كل راجل, ذكاء و زين و رضاة والدين.. هي اليوم اسعد مرا في الدنيا.. كلمها و قلها نحبك و بيك نعيش و عليك نموت.. و صغاري إنت أمهم و امي و اختي و مستقبلي كلو بين يديك و الحاضر ليك.. 

الموجة الخامسة: بعد الإعتراف لكبير.. حبها ليه ولا عبادة و حرقت وراها كل شيء و باعت الدنيا و شراتو.. كل شيء قدمتهولو على طبق من ورد.. سلمتلو في أغلى ما تملك منغير تفكير منغير ندم.. كل شي ولاّ عندها مباح بإسم الحب و لهنا غلطتها نسات العادات و التقاليد و إلي تربات عليه سنين على فرش الغلط تنسى..

الموجةالسادسة: "voila ton bébé? أغزر هذاكة راسو و هذيكا سقيه و يديه و قلبو يدق حاسة بيه؟؟؟.. علاش هكة علاش خليتو يكبر هكا" هذا اش قالها الطبيب هذا لكلام إلي يتعاود في مخها مرة ورا مرة و مزالت مستوعبتوش حبلت في شهرين و نص و طبيب فهم إلي هو ولد حرام.. بوه معروف و عهر أمو واضح  و مستقبلو مجهول.. عيط عليها و سب و تنرفز و لام و تسائل.. و هي مش هنا مخها سارح و نظرتها بعيدة..

مشوشة فكرة ملي جاي و فكرة ملي فات ...