كسر لقيود.. طير مع أحلامك في سما..

فديت من واقعي مليت..

ثور.. غير الواقع.. الدنيا أزين ورى شباك بيتك.. أخرج إتنفس و إحلم..

على شنوة باش نثور على بابا إلي رباني و خويا إلي حماني.. هكى تحبني نجازيهم

قتلك ثور بالعقل و الفكر..مقتلكش عيق بوك و أظلم خوك.. و زيد خوك إلي حماك و في الدار حجبك و خباك.. يحمي في شرفُ لا أكثر و لا أقل كيما علموا بوك.. علمو إلي لشرف معندوش علاقة باخلاقو و إختيارات.. عندوا علاقة بيك و إلي بين سقيك.. ميخممش في شرفُ كي يروح عقاب ليل سكران لكن يخمم فيه كي تغيب إنت درج على الدار.. 

شبيك تخلوض, ياخي لبين سقيَّ شرفي و شرفهم.. عيب كيحميوني و يحميوه!!! زيد قتلك فديت من واقعي و أش دخل هذا في هذا,, باللهي ناقصة كان تفلسيفك..

قلي..مش إنت تقلي تخنقت و فديت.. قلي مش هما إللي قالولك متمشيش تقرى في العاصمة "علم نفس" خايفين على الشرف.. ياخي علم النفس مش حلمك؟؟؟ أش عملوا كي حرموك من حلمك الوحيد في الدنيا؟؟؟.. مقتلوكش هكاكة و منعوك من الحياة بحجة الشرف و الخوف من العار و عدم الثيقة فيك.. 

إنت ضحية العقليات لمريضة و ضحية الأنانية الذكورية في مجتمعنا الشرقي.. قتلك ثور و أصنع لروحك صوت و موقف و راي.. و السلاح إلي حطينوا على رقبتك, إلي هو شرف, حطوا إنت في وجهم و إسترجع أحلامك و ذاتك.. نتفلسف وليت؟؟؟؟ 

عندك حق.. عندك حق قتلوني كي حرموني من أحلامي.. من وقتها و أنا ضايعة و عايشة هكاكة و منعرش علاش.. كيفاش نعمل.. كيفاش نقلب السلاح عليهم.. كيفاش باش نعصي بابا و نواجه خويا..و أنا حتى نفس منتنفسش قدامهم.. تي خويا هاك نهار عطاني طريحة على خاتر قتلوا منحطلكش لفطور.. تحبهم يقتلوني ولا يحبسوني..

ميقتلكش و ميحبسوكش هذاكة الكل ركبك من الخوف و الإرهاب.. كيما مخلوكش تعمل إلي تحب عليه بحجة شرف خليهم يرضخوا للتحب عليه بنفس الحجة.. وهمّهم إلي شرفهم باش يتضر كي يقمعوك و يحرموك ملي تحب عليه.. السلاح شدوا إنت في يديك.. أصنع واقعك و مستقبلك و تحرر من سيطرتهم عليك.. قوتك في مخك و قناعاتك.. مكش صغيرة و مش محتاجة شكون يحميك.. عقلك و علمك و فكرك يكفيك.. تحرر من سيطرتهم عليك.. قوم و إحلم و واجه و طير مكش باش تعيش مرتين... إصنع شرفك و خلي كل واحد فيهم يصنع شرفوا.. يزي متظلمت و معديت..