الثالوث المقدس

نقمة إنك تتولد مختلف.. في البداية ,الإختلاف هذا تبدى تحسوا وسط عايلتك قبل كل شيء.. متراش الاشياء كيما يراوها و أكيد هذا باش يقللقهم و يحاولوا يحولوك لنسخة منهم في التفكير..

حنين, هكاكة.. كانت بنية هادئة جدا من الطفولة، ديما تلعب وحدها و عندها صديق خيالي إسمو أحمد مالي عليها صمتها.. أمها و عايلتها يعرفوا احمد.. فمة خرافة قديمة تقول إلي لبنية صغيرة كي تعيط بإسم طفل في طفولتها يعني باش يجي بعدها ولد و حنين لبنية الثانية في العايلة يعني ولد هو البشارة إلي يتمناوها.. يحبوا طفل مش باش يورثوه ملياراتهم ولا شركاتهم.. الفقراء يحبوا طفل باش يحمي خواتوا كي يكبر و يورثوه ترزانة الجهل إلي ورثوها أجيال وراء أجيال.. 

كبرت حنين.. كبرت و كبر بها إختلافها.. نحن مجتمع ميفكرش.. دين و عرف و عادات و تقاليد, كلها تجمدلنا مخاخنا و تمنعنا من التفكير.. حنين تفكر ومتستعرفش بكل إلي لقنُهولها إلا متحلل و تقتنع.. لنا يظهر إختلافها ..

ياما وقفت قدام أمها باش تحكيلها على حاجة إسمها عفة الصبية تتمثل في قطرتين دم في اول ليلة من العرس و تحكيلها على جرائم الشرف في محيطها تخوف فيها باش تحرص على روحها و تحمي شرف العايلة بحياتها.. كابوس رافقها طيلة   مراهقتها يتمثل في ضياع شرفها, إختفاء قطرات الدم ليلة العرس رغم عذريتها رغم أنها محبت حد..

كان الجنس مربوط في مخها بالحب و الحب مربوط بزواج.. زواج, حب, جنس.. الثالوث المقدس في عقيدتها للحياة..  الثلاثة بالنسبة ليها يمثلوا حاجة بركا حياة  مستقرة.. رابط دائم يوفى كان بالموت.. 

الحب هو قداسة الزواج و الجنس, هو في قاعدة هرم الثالوث المقدس.. بلا به ينهار الباقي, بلا بيه الباقي الكل يولي بلا معنى..

جاء الحب, و دق باب قلب حنين و إقتحم عليها صمتها و عالمها المثالي, بعد الحب باش تستنى يكمل الهرم المقدس.. الزواج و الجنس.. سؤال لنا, أناهو قبل لاخر..

مكانش بيدها فمى تدرج و تسلسل في بناء الهرم فوق طاقتها, طاقة الحب الروحية و المشاعر العاصفة  متكتمل إلا بالجنس.. الجنس هو إلي يخمد النار الشاعلة في أرواحهم و ترسملهم طريق المواصلة و خلاص من واقع يفرق ميجمعش.. حاجة أخرى تجمعهم في الحياة غير الحب.. هنا تبدى تراجع في قداست الثالوث إلي تامن بيه.. 

شنوة الزواج؟؟!! مش ورقة قانونية؟؟!! الورقة القانونية هل تملك من القداسة شيء؟؟ هل يصح ضمها بثالوثها المقدس؟؟ و شرف و العار شنوة يصنعهم؟؟ جرائم الشرف و العادات و التقاليد؟؟ و نقطة الدم المطوبة في ليلة الأولة متاع العرس ؟؟؟؟

كلها مفاهيم لازم تراجعها..