بلاد سكزفرنيا العرب

إي نعم قوية و دمعتي مهيش سخية 

واقفة كيف جبل ميتهز و ميأثر فيه حتّى دز 

قلبي و مخي واحد مش ثنين 

ضربتك بين كتافي ما نجمت تقتلني

و غدرك مينجم كان يصنع خبثي..

قوية و قوتي متنفيش كوني مرا

الولاّدة و الوسّادة..

و إلي من بين يدها تتشحت خبرة لقلبك و زينة لدربك

أنا إلي في بلادنا تبوس ساقيها في السر و  تسبها في العلن..

بلاد سكزفرنيا العرب..

 بلاد الفقر و الكبت و البنية من أول متتولد سعدها يتكب

تتدفن من غير قبر و بشاهد كبير مكتوب عليه شرف العرب

تكبر و تبدى تمشي و تتكعبر يبنيولها ألف قفص

قفص داير بقفص..

قفص الخوف و قفص العادة والعرف 

يحبوا يضمنوا إنها متفلتش و للحياة متهربش..

ماهي من ضلع آدم تخلقت و لسعادتُو توجدت

لازمها من تحت ساقيه متتحررش..

لراحتُو تفني لعمر و لرضاه تجْتهِدْ...

"رضاء الله من رضا الزوج" 

يجيشي تعصي الرب على حكايات فارغة تسميها مساواة و كرامة إنسانية

علاش علاش.. إلي عند ربي خير..

هكا ضحكوا على كعبات منهم 

غموهم تحت السواد و قلولهم عينيكم فتنة و خطرة 

و غريبة خضعوا و رضاو و تحت خيم تغَمَاوْ..

الرب إلي صنع الجمال عمرو ليخليه يموت و يذبال...