الموت يحيي برشا حاجات فينا (ثورة)

سمعنا عيطة 

فقنا في وسط زيطة

رصاص و موت و ألم و جرح غارق في الدم

الرصاصة ليه, لكنها سكنت فينا.. 

شكري تغدر

ذبحوه ولا إغتالوه ولا مع سبق الإصرار و الترصد قتلوه

أعدموا لبدن و مقدروش على الفكرة

توجعنا و تشوينا 

إبكينا و إحكينا و شكينا 

خرجنا ألاف نندنا بغدر الوطن

ثرنا ملايين و على قبرُو تشلحطتنا و غنينا

"حياك بابا حياك ..."

بالمورفين جراو زرقولنا.. 

خدرونا, نومونا و على الثورة منعونا

سكتنا, بكمنا 

صوتنا في وسط حناجرنا كتمنا

دموعنا في عينينا أعدمنا 

و وسطنا جرح محبش يكف

و دمعة محبتش تترشف

و كيف البكوش يمينا في صدونا كتمنا

من المورفين صحينا 

و على جروحنا فقنا و عاودنا بكينا

صحيح تخدرنا و في بالهم بردنا و نسينا

في لحقيقة نارنا شاعلة لكن ما حكينا

في عيد الوطن, تجرئوا على الشعب إلي تغبن

و إغتالوا النجمة لحزينة 

و فاع الدم في وسط بقعة بياض و محبش يتلم

البراهي مات, لا إغتالوه

و كيف شكري مع سبق الإصرار و الترصد قتلوه

جرحنا زاد وساع و دم زاد فاع 

و نار قلوبنا ولعت و رواحنا لهبت 

على بلاد نحييوها بالكلمة الحرة و الدمعة المرة 

تهديلنا الموت و توكلنا الف كبوط

تي ثور و تغشش و قاوم

و على حقوق إلي ماتوا

و الحيين الميين إلى على جهدنا عايشين

دافع و تقدم وسط الكرتوش صدرك رافع..

متأيسش و في بلادنا متسلمش..

متتلفتش التالي مفمى كان لمدافع 

على قتلك ناوين.. 

بالجوع ولاّ بالكرتوش ولاّ بيدين

المفيد على الكرسي يقعدوا متربعين..

ثور و على بلادك دافع  و على الميتين و العايشين رافع.. 

الثورة يصنعها المنسيين المقهورين

إلى على خاتر الخبزة ممرمدين 

التسجيل الصوتي عبر هذا الرابط: https://soundcloud.com/rimanimatrice-1/kgoa2phuatk6