وحش..

"توحشت"

خليها تخرج, خليها تخض السماء 

خليها كيف النسمات تحرك الشجرات 

خليها تفيض الأنهار و تسقي النبتات و الزهرات

توحشت إي توحشت 

و منعرف شيء غير توحشت 

حروفها في قلبي مڨديّة كيف النار في جواجيّة..

توحشت لبلاد.. توحشت بلاد..

توحشت "وطن" على الواو نتكى فوق النون نمد ساقيا..

توحشت لحبيب, توحشت حْبيب ..

توحشت "عشير" فوق قلبو نسير و من شفايفو نتروى

و في غير صدرو ما نلقى حتى دوى..

توحشت..

توحشت بلاد و عباد و وجه سماء 

غير السماء إلى توا عليا تطل

و نجوم غير النجوم إلي بعد شوية عليا تهل..

توحشت أي توحشت..

توحشت شيء عرفتو و شيء معرفتوش...

توحشت درجيحة..

ندرجح فوقها و نغني:

"درجح يا درجيحة درجح 

أطلع بيا الفوق و جنح "

و في بلاد غير لبلاد تجنح الدرجيحة 

تطير و تعلي و فوق السحاب تغني 

أحلى ما شعر نزار على الأحلام

و أقوى ما قال درويش على الحريّة..

"فأشهد أني حَيٌّ و حُرٌّ حين أُنسى"

في ها الثنية تنجم تدغدغ ساقين النسيان 

تفيقو كيف الجنيّة و يحققلك الأمنيّة..

كان من شويةْ العقل إلي زرعهم فيك حب الحلمة المنسيّة..

راي تحققت الأمنيّة و نسيت شنوة توحشت.. 

و نسيت إلي وصلك لها الثنية.. 

و ترفض الأمنية و تلعن النسيان

و تتفكر أش توحشت و تكمل الثنية غير الثنية..

توحشت رحلة تبدى من تونس إلى مصر إلى لبنان للعراق إلى الكوبا للبرازيل

و نرسي أخيرا في بلاد المجاعات و الجوع

و نخلي قلبي طعام لطفل صغير فيه كان الضلوع.

توحشت نعوم في البحر خفيفة منغير دبش 

كيف هاك لبنية الصغيرة إلي كانت فيا 

لا بزازل و لا ريق فيها العنين تضيق.. 

توحشت, توحشت نسكت 

و  في مخي نحكي برشا حكايات

منغير ما نتمنى ستيلوا يوصل صوتي لوذنين ماعندها للأحلامي صبر و مباة..

توحشت, بيت صغير على جبل بعيد على الناس معبي بالإحساس 

نزرع و ناكل, نكتب و نقرى, قهوة و نوم 

لا خنقة و لا زحمة و لا حس 

و لا مشاكل سياسية و أزمات اقتصادية..

و لا الوسواس الخناس يركبني كل عشية..

توحشت, توحشت 

توحشت برشا احلام عايشة فيا و بيا..

 للواقع تلوج في ثنية ..