ضيف و طيف

هاربة من الحكاية,

من وجهو في تفاصيل الرواية..

هاربة من طيفوا,

من رسم وجهي في المراية..

هاربة من أثار لمساتو على جلدي

و همساتو في وذني 

هاربة.. 

هاربة مني,

من ذاكرتي,

من لمسة قبلة في خطوط بدني جوالة.. 

هاربة من ثنايات عبيتها أحلام و خطوات 

خطوات عفست فيها على نظرات الناس

و تحملت نبذهم و مقتهم..

هاربة من لحظات..

سلمت فيهم في عقلي و طرت معاك في سماوات

و نرجع لنفس اللحظات 

لحظات ندم, لحظات هم 

لحظات تولي فيهم الذكرى سكين

و الحب كمين

و الأحلام طعم بنين

لين يولي بطعم الدم,

بريحة الهم و الندم.. 

هاربة مني..

هاربة من حروف إسمك في رسمي..

هاربة من هبلاتي ..

هاربة من بهامتي..

هاربة من رزانتي..

هاربة..

الشمس بدات تميل..

و الليل خيم على ركني لحزين

و الراس على المخدة مال

و النوم غمض الجفون...

في ها الوقت نعرف إلي الهروب محال و جنون

و الحب, فنون..

متنجم كان منو و ليه تهرب.. 

الشمس بدات تطلع

و النوم زار الجفون و ما كحل لعيون..

نمشي لوجهي للمراية و نرا الدم في عيني رواية

و تحويقة عيني ذكرى و حكاية..

و إلي هاربة منو ساكن فيّ..

و نعرف إلي  منجم كان منو و ليه نهرب..  

هاذي حكاية عشقة مينفع فيها لهروب,

مينفع فيها دمعتك تذوب..

مينفع فيها تخبي وجيعتك بكلمة لاباس

و بسمات على شفايفك تبات..

وجيعة في عينيك تسكن

و دمعة على حضن حبيبك تسخن..