كلمة حية, من القلب و أكيد باش توصل للقلوب

إنقسام و هجر و ملام و حلمنا سلام..

حلمنا وطن لا سجن و لا قفص نتحبسوا فيه كيف لحمام..

تخلقت باش نعيش في سما منغير سقف منغير حدود, جوانحي تخلقت باش تشق لحدود و تيارات لهوى لقوية و حتى كيف تكون نسمات..

صوتي عالي في كلمة لا, ال"لا " العريضة المعارضة كلمة لا إلي متجيب بلى و كيف تسكت , سكوتها كبوس في نفوس الزنوس...

أنا, أنا الكلمة الحرة و دمعة مواطن مرة, مرة من صعود الجبال على جرد لقمة, على حق حياتي.. حتى لحقوق في بلادي ثورة و عركة و شهيد و دمعة عبيد..

وقتاش حكامنا يفهموا أحكامنا, يفهموا مطالبنا و يوقفوا إنقسامنا..

في صباحي هذا نحب نلم ها لبلاد في حلمة و نعنق كل الطوائف و الأديان و الأفكار و القلوب لحرار و رغم الإختلاف نعفسوا على الخلاف و بين الكلمة لولة و الثانية برشا إنقسام و حروب و معارك و كره و خوف, في صباحي هذا نحب نقول نحبك يا تونس لملونة بينا و طرقنا الغريبة باش نحميو الحق إلى في نظرنا منغيروا الدنيا تنشق و نقولكم الكل أصحابي و أهلي و ناسي و خواتي إلي يلمنا نفس لون دم, دم إلي سال و كيف سال مفرقناهش يسار ولاّ إخوان, عرفناه دم إنسان..

نحب نقلكم الكل "نحبكم"نـــــــــــــــــــــــــــــــــحبكم و نحب نتلموا و نفرحوا بالإختلاف و بالألوان و بالأعلام, كلها تتلم تحت نفس النجمة و الهلال..

 و بدمعة سخونة باش تحسوها وسط الكلمات نلمكم في صباح كما الصباح إلي تفرقنا فيه و زرقنا قلوبنا كيما صوابعنا و كرهنا فيه..

 صباح الخير يا تونس, صباح الخير رغم الإختلاف إلي في ها الصباح نحب ننسى إلي هو خلاف..

صباح الخير على العلم و النجمة و الهلال إلي يعوموا في أبيض السلام رغم الدم و الدموع إلى من القلب تفوع..

بين قلبي و قلبك إختلاف و فراغ يحبوا يسميوه خلاف و إنقسام و صراع و أني نحب نسميه حب و وفاق و العلم إلي لم بين أحمر الدم و الوجيعة و أبيض السلام لا الإستسلام يلمنا بالنفس الطريقة و يرسمننا بنفس الجمال