لعبة لحروف

نصرط في الريق مانلقاه 

مريضة و مانعرفش علاه

من بلاد الهم و الجرح إلى ما يتلم

من عبادها؟ ..زايدين جراحها و هاجرين أمحانها ..

من ولادها؟.. حاضرين أفراحها و ناسيين أتراحها ..

من إلي حب؟ و عمل المستحيل باش قرب 

تمسكن و كيف تمكّن

في قلب روحي دكّن نوحي

و زاد وجيعتي و طول ليعتي

مريضة..

أما في عينيا فرحة مذهبة بأحمر الوجيعة

أحمر الدم و الدموع,

أحمر الحرية إلي من القلب تفوع..

مريضة..

و مسكون بالأمل و طيف حلمة متموتش مع الليعة..

على طاولة السكرابل نظم 3 حروف

الألف و الميم نوسطهم بلام الخوف (ألم) 

و نخسر قدام خبث الوقت و غدر الظروف..

و في لحظة تتقلب لحروف,

الألف و اللام تتوسطهم ميم الأحلام..(أمل)

يتقلب الطرح و الخسارة تولي نجاح

و في قلب اليأس نغرس حروفي أفراح

و نغزر لروحي و نقول خسارة طرح ملازمش تضيع أطراح

 التسجيل الصوتي عبر هذا الرابط:https://soundcloud.com/rimanimatrice-1/m0c8dy6axvfj