أحلام إستثنائية

بلاد خنقة.. 

تعرف كان الفلقة 

أحلام تتنفس بالقصبة.. 

مخممناش في الهجة.. 

خممت في قارب فيه ننجى 

مديت إيديا لجيوب لكفن

يقولوا لكفن معندوش جيوب 

لا, عندوا جيوب معبيا بالأحلام و الأماني

مليانة أغاني

أغاني حياة تتدفن مع الأموات 

الموت..

موت بدن و حلمة غارقة في الفن

هذا كفني..

نعرف قداش عبيتو بالأحلام و قداش بالأماني دكيتوا

و قداش سمعتوا أغاني..

و قداش كتبت عليه بقلم و حروف منسية

قال جبران و ردت عليه مي في رسالة أبدية

حكالها على الحب و محلاه كيف يتوج بالزواج و تتعانق الأرواح للأبد

و حكاتلوا على عشقة  و محلاها كيف تعنق المستحيل و تخلد ذكرانا لحزين

كتبت عليه خلاصة قلب و عصارة فكر..

فكر رمنسي, إنساني, منسي..

جيوب لكفن معبيا حروف و حروب و ستيلو و سلاح 

معبيا كتب و نصوص.. 

مديت ستولويا و قلت نصنع قارب نجاة

مديت ستيلويا و قلت نكتب آخر نص, آخر حملة, آخر غناية..

قلت نزيد لحياتي نهار و نحل في الكفن ثَنْيَة 

قلت نصنع حرف نموت بعدُو و نحيا فيه.. 

شديت ستيلويا و حبيت نكتب..

حبيت نحلم و نعيش.. 

كتبت قصة كذبة و قصة عشقة و قصة قبرين بين لحروف مخبين..

و قصة أموات و جنايز مشيت وراهم وحدي و نبشت التراب بضفري 

حطيتهم و غطيتهم  بشفري

حبيت نهديلهم حرفي زادة,

حبيت نعيشهم بين الكلمات كيما قتلتهم وسط الحلمات

كتبت آخر حلمة و آخر كلمة و آخر دمعة  في آخر نص 

و خرجتهم للدنيا..

حبيت نصنع الخلود و نكسر مفهوم اللحود..

حبيت نقلب الأفكار و نخلي أسرار.. 

حبيت نعيش..