فن صناعة الأحلام من الألم ♥ ♥

أنا و وجيعة قلبي حكاية..

غناية ملحنة بآهات مزيانة

مليانة بوعود الماضي المشهود

معبية آمال و وعود لمستقبل منشود..

وجيعة قلبي غناية و لحن ساكن فيا 

لحن حياة و ممات 

لحن فرحات و تحديات

و برشا حكايات مشات و فنات 

و غصة فرحة مستقبلها مجهول 

فرحة لقيطة 

لعندها لا بو و لا خو

و لا عايلة تحميها من غدر الناس الناوية تفنيها

- أه يا مهبولة تتغزل بوجيعتها و ردتها غنايتها 

- و لنا الجنون كي لا يقتلنا الواقع الميبون 

-شوف كيفاش تتقبح؟؟؟

- مش أكثر من القباحة إلي تستفعل فيك و فيا

مش أكثر من الواقع لمبهذل بيك و بيّا 

- الواقع خاطيه مسكين إنت إلي القبح ساكن فيك و مستفعل بيك

أنا!!!!

توا باش نقلك يا مهبول..

المقاومة تخليني نسمي جرحي مدينة

مدينة أغاني و أماني

ساكنتني و ساكنة فيها

و نسمي آهاتي لحن

لحن حياة

لحن لطريق التمرد و الحرية و الفرحة المنسية..

أنا إلي نرسم الدموع بالبسمات

مش هبال أما مقاومة 

رصاصي الأمل

و ورقة و ستيلو وبرشا كتب و فن 

مهبولة خاتر نسمي في ليلي صباح 

خاتر نسمي في قِبْلْتِي الشمس 

و نلوج عليها في ليلة ظلمة 

و منلقهاش..

نرسمها بخيالي  و نركع قدامها

و نطلب مطالب و أماني شرعية

في صلاة وثنية..

نطلب صباح و نور و نوار 

في الواقع مش مجرد أفكار..

شمسي لحقيقة في ظلام الأوهام..

منيش مهبولة و منيش قبيحة..

أما ننسج من وجيعة قلبي أحلام