مواطن سعيد

مشنوقين, مخنوقين..

بين الأيام مخبين..

نلوجو على حظ, على فرصة,

على صباحات بلاش غصّة.. 

نخمموا في شهيد, في موتوا مشدينا حتى إيد..

بلعيد , لبراهمي, نزار

في الأرض الوطن ملقينالهم حتى زار..

في قلوبنا مدفونين, منسيين..

علاش وحدي هازة هم لبلاد و العباد..

كل دمعة نرسم بها الحدود و القبور و اللحود..

نرسم بيها وجه الشهيد و نقول هنا مشا و خطب و وقف و عيط

و حب يفيق الميتين و يخرجهم من تحت التراب و يهديلهم عمر جديد

ياخي هداولوا قبر جديد,

خلالهم كلمة و عيطة و فكرة

مستحيل تموت و تقعد ذكرى 

نتفكر وقت ريتك قدامي و بيناتنا خطوتين 

حبيت ناقف جنبك و ناخوا تصويرة 

تقعد حي بيها في قلبي و قدام عينيا 

و كيف ملقيت كيفاش نقربلك قلت خلي فرصة أخرى..

يا شكري سرقوا مني الفرصة و الفكرة و الحلمة..

نحب نعرفهم و ناقف قدامهم و نسألهم 

كيفاش نداوي ها الجرح, و نحي ها الغصة..

كيفاش ننسى و نسهى..

كيفاش نوليو شعب يعرف البسمة..

كيفاش نرسموا أمل و أحلام و ثورة مليانة فكر و فن..

و نمشي في شارع الثورة و نقول هنا كنا شعب سعيد

و نسأل النسمة و الحجرة و الشجرة كيفاش نرجعوا شعب سعيد 

"و نغني بصوت عالي "سنمضي سنمضي إلي ما نريد*** وطن حر و شعب سعيد

التسجيل الصوتي عبر هذا الرابط : https://soundcloud.com/rimanimatrice-1/fup1trfsvkrg

مواطن تونسي وضع حدا لحياته يوم 10/12/2013