العضمة الحارمة

"كل عش لازم فيه عضمة حارمة"

الجمل سمعتها من عند بابا أول مبديت نفهم و نحلل إلي نفهمو, و بدا معاها خوفي من إني نكون هاك العضمة الحارمة في عش دارنا.. قريت و ركزت باش نتفوق في قرايتي رغم كرهي للمدرسة و المعلم و كل فم في القسم يتكلم..

أني من هاك الجيل إلي قرا في قسم فيه 30 و 40 تلميذ و قراونا معلمين مخاخهم صغار باش منقولش حاجة أخرى يميزوا بين المزيان و مش مزيان و الغني و الفقير و الطويل و الضعيف و البهيم و الذكي.. على حسب الميزة إلي عندك يجيك الإهتمام.. كيفاش تحبوني نحب قراية هكا؟؟؟

رغم هذاكة الكل قريت و تفوقت و كنت من الأوائل و دافعي الوحيد خوفي لنكون العضمة الحارمة.. كبرت و جينات العظمة الحارمة تحركت فيا و التمرد ولاّ طاغي على كل شيء فيا.. و أولهم قصة شعري لقصيرة.. الطفلة لازم يكون شعرها طويل و أنوثتها كاملة و محتشمة كان لزم... يحبوني نلبس هكا, نلبس العكس.. يحبوني نقرى كتب القسم نهرب لكتب جبران و طه حسين و ميخائيل نعيمة.. يحبوني نشاور كيف نخرج, نخرج و ما نشاورش.. 

 بطبيعة بدا قلق بابا مني و خوف أمي عليا.. و بطبيعة أني هي العضمة الحارمة إلي محرمة عليهم لهنى و الراحة في الدار..خايفين عليا من روحي و من الدنيا الكل يحبوني نتربى و نكبر في القطن.. منجمش, نحب نخرج و نجرب و نصوحب و نتغدر و نتليع و نحزن و نبكي و نتعلم, نتعلم من تجربتي مش من دروس يقريوهملي ملي قراوه و شدوه من تجربة شخصية متنجم تزيدني حتى قناعة صحيحة و حتى معرفة مقنعة..

 منجمش نكون كان هاك العضمة الحارمة, منجمش نغمض عينين عقلي و فمو  و نسمع كلامهم هذا يصير و هذا ميصيرش و هذا  يجي و هذا ميجيش.. و النار إلي تحرق نحب نحط فيها يدي و نحسها نار و تحرق و نفهمها علاش تحرق.. مخيبوا إحساس العضمة الحارمة.. من جهة إحساسي بالذنب من عمايلي و من جهة قلة رضاية ولديا عليا و نبذهم ليا.. 

نعمل العملة و نعارك روحي أكثر ملي عاركوني و نعاقب روحي أكثر ملي يعاقبوني..

لين في مرحلة معينة فهمت إلي أني مختلفة.. و إختلافي مش نقمة.. و حبي للمعرفة و طموحي باش نلقى الحقيقة خلاني متمردة عاشقة للحرية, خلاني عضمة حارمة في نظرهم و في نظر لعباد.. 

إي نعم أني هي العضمة الحارمة و قداش محظوظة و سعيدة خاترني حارمة.. 

أني هي العضمة الحارمة و معندي حتى إحساس بالندم و نقولها راسي عالي مفتخرة بالشيطان إلي فيا سكن..