رثاء ثوري لعمري الذي مَرْ ..

اليوم نعمل ال24

 اليوم حاسة روحي مازلت كيف ولدت

مازلت كيف بديت

مازلت كيف حطيت ساقي في الحياة

منيش باش نبكي ع إلي فات..

و نحسب قداش لميت مكتسبات.. 

قداش دفنت أحباب و قداش طحت و تمرمدت و توجعت و تغدرت.. 

باش نخمم في عمري إلي فات

و نخمم قداش إستمديت منو ثبات..

قداش  من الوجيعة تعلمت..

و قداش من الفرحة تبسمت..

باش نخمم قداش مزالي في الحياة؟؟

زعمة أكثر من اللحضة إلى فوقها راكزة و على غيبها مركزة و بانية..

غادي نلقى أهمية عمري..

غادي نلقى أحلامي و طموحي..

غادي نعرف قداشني صغيرة و قداشني رابحة أعوام..

عمري لحظة..

لحظة نعيشها بذاكرة معرفة قوية و نْفَسْ أمل طويل

و روح شابة شايبة, عمرها لحظة تشبه للأزل.. 

هكا نحسب عمري لحظة عايشتها

و كتاب تاريخ محلول تبعثر فيه الأحلام لمطشتها .. 

اليوم نعمل الأربعة العشرين

و تقرب الثلاثين و بعدها لربعين و

ممكن تزيد السنين و تزيد..

تزيد في حسابها و تثقل في كتابها و تطوال في عذابها.. 

أما أني باش نقعد نعيشها كيف البارح كيف اليوم 

كيف العشرين, كيف الستين.. 

لحظة نسرقها من العدم و شمعة نضويها  في ظلام الأزل 

لنا تعديت و لنا لازم نخلي أثر.. 

رغم لعمر عمرو ما يمر 

و يتمحى.. 

لنا تعديت و هذا إلي ما لازموش يتنسى 

عمرك لحظة عمرها أزل معادش تحسب العمر بالأيام و السنين..

عيش اللحظة بخفتها و دنيتها و متنساش ترسخها