معرفة

وقتاش نكبر

و نولي في الستين

و شيبي يغمز بالعين..

و يتملى القلب أسرار

و العقل حكمة و دمّار

وقتاش نكبر هكا سئلت أمي 

قتلي وقت تولي ربت دار و تعمل راجل و صغار و تلبس الخمار

و تولي سعيدة كيف أمك بكمشة فروخ و خنار نساء كبار.. 

وقتاش نكبر هكا سئلت بابا 

قلي وقت تستوى

و تصرف على صغارك كيف الرجال و تنظف دارك كيف النسا..

وقتاش نكبر هكا سئلت جدتي..

قتلي وقت سنونك من قدام يطيحوا و تسقط من مجيبت الصغار و ظهرك يتعوج

و تولي تصلي ليل و نهار..

بابا,  أمي و جدتي.. زعمة تعيشوا في نفس الدنيا إلي نعيش فيها؟؟

زعمة تبنيو نفس لحقيقة إلى نبني فيها؟؟ 

أمي,  إيجا شوف

قداشني أم لبرشا نصوص

منغير كمشة فروخ

منغير راجل و دار و برشا خنار يسميوه إنجازات ربة دار.. 

و شعري منغير حتى قيد يلموا..

متناثر في وجه فكرهم لمسوّس و حكمهم لمخوّخ..

بابا,  إيجا شوفني قداشني في ثنية الهبال مستوية.. 

و قداش خشمي الفوق و جبهتي مقبلة للشمس و قامتي مش محنية..

و شوف قوة الرجال تحت ساقي تتبعثر و تستوى.. 

جدتي, إجا شوفني قداش صليت للأمل

و عطيت للوجود تسابيح فيها برشا فن..

إجا شوف قداش ظهر أحلامي مريض لكن عمروا مسلّم و تعوج..

إيجاو شوفوا بنتكم قداش كبرت خارج أحكامكم بعيد برشا على إنحراف آمالكم..

و مازلت نحب نكبر و بكل شعرة بيضة نكتب.. 

و كل خط في وجهي يحكي تجارب.. 

بها كبرت..

و قريب نوصل لستين

و شيبي يولي يغمز بالعين..

و يتملى القلب أسرار

و العقل حكمة و دمّار..