حلمة

نمشي في ثنية المرواح من الخدمة ندهكل و نخمم, و مذابية الثنية تزيد تطوال و تطوال, نحب نزيد نتأمل, نزيد نحسب و نجمع و نطرح و نخمم في الحل و الحل البديل و البديل للحل البديل..

نحس في تنميلة في ساقيّة تفيّق فيّا من عالم الإحتمالات, وين منلقى وين نقعد و نبات.. التعب, التعب بوه كلب فيقني من سكرة حلمتي و بنّة دنيتي.. فكرني بخدمتي إلي منيش راضية عليها, لكن لازمني نخدم و نكسب و نستقل.. باش ميذلني حد بلقمتي.. باش ميكسرلي حد بلومتي.. باش نكون قوية و ما نتهد..

و أني هكاكة يهجم عليا كابوس قريب يخنقي, زعمة نكمل عمري في خدمة كيف هكاكة؟؟ زعمة أحلامي إلي خذات من عمري سنين و سنين تنجم تموت تتنسى مع لأيام؟؟؟ و نقعد سجينة خدمة نمارسها كيف الروبو؟؟ لا نحسب و لا نصنع و لا نلقى حتى كيفاش نبدع؟؟ تخنقت. جبت لهوى, محبش يدخل لصدري يحب يمنع عليا الحياة و كينوا يقلي تموت بالشهقة التنفسية و لا تموت بسقطة أحلامك يا مبلية..

إي نعم مبلية,

مبلية بدى الحلمة المنسية

إلي للواقع ملقات حتى ثنية..

و بعد الخنقة نرجّع النفس بضحكة قوية.. 

نغزر للواقع في عينيه و نقلوا متنجمش تخنقني و متنجمش تقتلني

و زيد خرجلي عينيك و إقحرلي حاول تخوفني

منخافش...

حلمت و مازلت نحلم و كل متقتل حلمة نولد في بلاصتها عشرة و و نزرعهم على أرضك يا واقع و بسيف عليك يلقاو وين ينبتو و يكبرو و نلقى منين نقْتات و نعيش و نربي الريش

تابع القراءة »

خيانة

قلتلها و منعرفهاش..

الدنيا ناسها زنوس, يعطيك اليوم بوس و دنوس 

باش غدوة عليك يدوس 

و يضمن فمك متحلوش

و كيف عرفتها

و ريتها في وسخ الحياة تحوس

حرت نسخف عليها ولاّ نكمل عليها 

نلومها ولا نلعن النفوس

إلي ماشي في بالها بالفلوس تنجم على الناس تدوس

حرت فيها و شوية عليها

حزينة, مهدودة, ضايعة, نادمة 

لقات روحها بين حيوط الهم

مرة تسب و مرة تبرر

و مرة حاشمة على روحها

مكياج و برفان و برشا مسكوات

أنا الوحيدة إلي نرى في حقيقتها 

نرى فيها مرة مجروحة و دمها يصب و 

مرة ثعلب مكشرة على أنيابها و تستنى باش تعض

مجتمع  منافق

نافق أو وافق و مفماش خيار ثالث

تابع القراءة »

يوميات زوالي

فاق كي العادة الستة متاع الصباح، مازالت الدنيا ظلمة..فاق مزروب كيما كل يوم وفي مخو ألف حاجة وحاجة؛ برشا حاجات ما لقاش وقت باش يحلم بيهم في منامو..رقد تاعب مهدود.

شرب قهوة خفيفة، حكّة البُنّ ماعادش فيها نسى باش يشري باكو بُنْ البارح وإلا ما عندوش فلوس آخر الشهر توا! ما يهمّش..ماعادش حتى شي مهم، المهم يقوم كيما كل يوم يجري ورا الكيران وساعات على ساقيه باش يخلط للخدمة. يخدم وعينيه منفخة..كره الخدمة اللي كان يحبها..حاسس إنو يخدم لغيرو وجهدو ضايع وعمرو فاني. شبيني ولّيت راضي بعيشة العبودية؟ شبيني مش حاسس إني إنسان؟ نخدم ونخدم ونخدم ونرقد..مش عيشة، حب يصيح بكل قوتو..خانو الصوت والجهد، خانو الواقع كي جا قدامو كرا الدار ومصروف الصغار. روّح آخر العشية مهدود حيلو ونسى ما خذاش حكّة بُنْ، باس صغارو وبكى كي تخيل انو نهار يجرالهم كيما جرالو وحلف ماعادش ساكت، باش يتكلم باش يدافع على حقو وحق صغارو وبدا يفكر ويكمْبص حتى خذاه النوم. فاق الصباح وفي قلبو غصة: نحبّ نحلم نحب نحلم كيما الناس الكل.

كتابة عاطف عَمُر 

تابع القراءة »

يوميات زوالية

خليوني نبكي مدام زهري هذاكة أش عطاني..

مدام المولود في بلادنا لازم يعاني..

خليوني نبكي بشفقة و نسمّع الشهقة..

مدام شهايدي معلقة في حيط الدار..

و يذلني راجل مقرى حتى نهار.. 

خليوني نبكي  بشهقة و نسمع صوتي

ليلي راقد و إلي يخدم و إلي يقرى

و للفقير إلي يحلم بالثروة و الغني إلي على عرق الخدامة تكى..

خليوني نتكلم بالقوي و شجعوني كيف نهز راسي..

.و منخليهش يحنى

خليوني نعيط في وجه العرف, خلوني نخلص حق كل خدام 

حق كل زوالي تحت ساقين المال نداس

تذل و توجع و بكى و مرات دمعتو كان لمخدة

خليوني نصيح في وجوه الغُنية

و نوريهم دمعي من القهرة 

خليني نحسسهم بهمنا بتعبنا 

و نوريهم يديا لمجرحة إلي تشريلهم فرش الريش 

باش ينساو  عرق الزوالي  و الناس لمخدرة باللقمة

يا ويلوا  يخدم يتذل و يتظلم

 يا ويلوا يصيح و يرفض و يتحرم من اللقمة 

اللقمة لمغنسة بالقهر و الذل

شاهية نصيح في وجه  كل ظالم كبير و صغير

و ميهمنيش كان داسني واحد فيهم تحت ساقيه 

ممكن يمحيني, ممكن يوجعني

لكن مستحيل يمنع صوتي يخرج و يعمل حس

و يحسّسْ..

 خليوني نصيح و نسمع صوتي للنايم على عرق الفقرى

و نفيّق لفقير إلي ماشي في بالوا الفقر مصير

و القهر قضاء و قدر كيف مرض ولدو لكبير 

تابع القراءة »

فِكْرْ تِكْفِنْ

باللهي تغشش و سبّ  ميسالش و عيط في وجه إلي تراه غالط..

خير من المشية تحت الحيط و غناية أخطى راسي و أضرب..

شنوة فايدت لعمر كان باش تلمو في كفن الخوف و السكوت..

السكوت ينسجلك في كفن الموت..

و إنت.. إنت همك في النوم و حق دبوسة نهار السبت..

همك في الافيون, في السكرة, في الطفلة إلي تكللها عقلها بفكرة

مخك في إلي حرق و وصل و فيّس عليك بلقمة

لمها بالذل..

لمّها بالخدمة إلي مترضهاش في بلادك بقدر..

مخك في السارق إلي صبح غني بعرق الفقرى..

مخك.. مخك بين ساقيك

مخك متخدموا كان في الخنن

حاول تقرى كتاب يحكيلك على الحب ولا المركسية 

يزرعلك في مخك الافكار الثورية..

إسمع غناية تحكيلك على الفقِير و إلي يحب يجنح و يطير..

إسمع غناية, تذكرك فيا.. 

تذكرك في حلمي بعالم نظيف خالي من المادية

ميتة فيه الراسمالية.. 

عالم نرسم فيه بعمري و بدمعي و بحبي لحياة تحبط فيا..

تذكرك باش تقاوم و ترفع السلاح في وجه لمخاخ المبلية.. 

تنقدهم, تخنقهم, تلعنهم و تضربهم تحاول تفيقهم 

تحكيلهم تفههم تقنعهم..

ميسالش خليهم يكرهوك, يسبوك, خليهم يمقتوك..

المهم خليهم يتسائلوا.. حللهم في مخاخهم فارعة..

هد خلي نبنيوا من جديد..

تابع القراءة »

غربة

نحب نغمض عينيا

و نلقى أحبابي دايرة بيا..

مليت من الغربة إلي تاكل فيا

تعبت من وحدتي وسط أهلي و مالية

كيف بطلت الدخان قلت نبطل حب ها الأوطان 

زعمة باش يكون إدماني للنكوتين أكثر من إنتمائي لهوية ضايعة مغلوطة

زعمة حبي لِ الروح إلي نطلبها تجيني

نحرقها و نستمتع و على طول يدي نطيشها 

و كيف ناديها ترجع من جديد.. أكبر من حبي لوهم 

وهم بلاد كل منقربها تحرقني و تشويني

سخون تكوي بدم الشهيد 

شهيد الكلمة و شهيد الخبزة و شهيد العيشة القاسية إلي تلزنا للحرقة..

حمرة بالدم والدموع, و الفقر و الجوع و التمرميد 

بلاد نراها في عيون الزوالي

و ناس إلي تعاني في شريان الخبزة و الستيلو

و حبار كتب رفع الأمية, و تجهيل الأمة إلي تحت السباط مرمية

نراها في عينين لحراير إلي تنظف في شوارعها

كاسريلهم عينيهم باللقمة, ذلينهم بنقمة 

يا يتعفسوا بساقين الفياسة

يا يتردسوا تحت عينين لعباد البهناسة إلي جايبتها سَخَّافَهْ

و ينساوهم كيف يدخلوا لبار خمسة نجوم و مطعم 5 نجوم و أوتيل 5 نجوم

يشري دبوسة ثلاثة بعشرة و ياكل شطر الصحن إلي بهاك الحسبة

و يرقد على على الحرير..

خلي عادة كان جا وزير

من فلوسها يمشي يكري بيت في وتيل

باش يتشاور مع بنت خالتو في مشاكل عايلية 

مشاكل برجوازية..

عباد مشكلتهم العيشة, ليلة على ليلة تبات جعانة و ناقصة خبزة 

"تضحك كيف ناديو "الشعب يريد إسقاط النظام

هي تحب تاكل و تقري هاك الصغير الحفيان 

الضايع في زنقات مدينة متحسش بعفست الساقين العريانة و الفام الجعانة 

و سعات تراه يبيع في السشيات, محروق من الشموسات  

و كيف نراه نعيطيه دينار ولا ثنين و ننساه كيف نحط راسي على فرشي لحنين 

ننساه كيف يسرقنا لوزير و يكذب علينا شيخ الكذابين 

نتغشش عليه و بعد فيسع نسامح و نعطيه فرصة 

أحزاب تموت على الطحين 

عباد شبعان متستناش منها تحس بالفقير

أه سامحوني, من حديثي على الغربة وصلت للسياسة و الغبنة

سياسة تاكل شطر صحن الكفيار و ناسية الشعب الجيعان

و الشباب الحارق و إلي كلاه الحوت 

و على روحو حطت وردة بدينار و مشات رقددت في قصر المليار

و الشعب.. و الشعب.. إلي ينادي بإسقاط النظام

و بعد قعد يفاوض على كرسي من النظام 

و نسى هاك الجعان الحفيان

إلي كل أحلامو فرش دافي  و كرش شبعانة و كتب تقري و متعميش 

يحب يقرى و يولي وزير بالك يدافع على لفقير..

بالك مينساش العينين المكسورة باللقمة

و الأفام لِ مجهلة بكتب رفع الأمية

بالك يرجع الإحساس لزنقات لمدينة 

باش تحس بهاك الصغير الحفيان

و أمو المكسورة..

بالك..

بالك يرجع الإحساس و يقري الناس ..

تابع القراءة »

سكين الذكرى لحزين..

الشاهد الوحيد على ضعفي مخدتي.. و هي زادة سعات نشتهي نحرقها باش متحكيش كل صباح بالكحل السايل على حكاية كل دمعة و تفاصيل كل جرح.. 

نتفجع كيف أمي تغزر في عنيا و تقلي حاسة بيك فاهمتك و عارفة الحزن لمخبي في في قعر عينيك.. نتبسم هاك التبسيمة إلي نخبي بيها دمعتي المخزنة للمخدتي و نقلها "تخلويض, علاش باش نحزن و خبزي مخبوز و زيتي في الكوز" و نقوم نضحك باش تصدق مسرحيتي.. نشطح نهار كامل فوق جرحي باش نطمهم عليا لكن جرحي يزيد يحرقني و وجيعتي تزيد دمعي و سهري.. 

كل ليلة كيف نحط راسي على المخدة نتذكر لحكاية و مع كل دمعة نتذكر تفصيل, كل ليلة تتعاود تفاصيل التفاصيل في مخي كيف الفيلم لقديم, كل منتفرجوا تزويد دمعتي تسرح و  جرحي يغيص..  

لين ستانست بالوجيعة و بالبكى عقاب ليل وليت نعطيهم كارهم و وقتهم و نحظرلهم روحي, موعد مع تخليص الذنوب.. 

ليلة و مش كيف ليلة, مع موعدي مع دمعتي قد قد, ناقز التلفون, نلقاه هو يكلم فيا, تي هو, سبب دمعتي إلي متكف و جرحي إلي توا ينزف و ما كف.. بدات العركة داخلي.. نهز منهزش, لين قص وقت قررت نهز, فرحت و رتحت, عاود طلب , هزيت خرجلي صوتوا من تلفون مرة يلسع كيف الصوت و مرى يداوي في جرح منسي:

هو: وينك لاباس؟؟

أنا: لاباس!!!!  توا خطرلك باش تسأل كيف ناس, شنوة تحب في ها ليل؟؟؟

هو: صدر حنين و قلب صافي و عقل رصين..

أنا و بعد مشدتني ضحكة حبيت نبكي بتعدها على صدرو كيف أيام قبل: علاش للفراق كيف الصدر لحنين تلقاه عندي و كيف أنا إلي تحب عليها و معاها ترتاح؟؟؟

هو: مش لازم توا نحلوا الدسيات لقديمة......  نحبك

أنا: ههههههههههههههههههههه تحبني؟؟؟ علاش متفكرتش ها الكلمة نهار إلي خليتني و مشيت بعد عشرة سنين و مكلفتش روحك حتى تفسرلي ولاّ تكلمني و لاّ حتى تعلمني.. كيف تسألت نلقك خطبت و تصاورك جات قدام و إنت تلبس فيها في الخاتم, فيها إلي هي صاحبتي. ملتمش عليها و باركتلها. لمت عليك قبل بجمعة كنت في حضني تبات و في وذني توشوش كل دقيقة نحبك, بنفس الطريقة إلي وشوشت بيها توا.. 

هو بعد مقصلي على كلامي: نحبك باهي نحبك.. متزيدش عليا.. حتى بعدك مكانش ساهل عليا..

أنا: سامحني باش نعلق معنديش وقت نسمع كلام كيف هكا.. نسيتك من هاك نهار و تصويرتك دفنتها مع كل ذكرى.. باش نعلق, قاعد تاخولي من وقت نومي و تضيعلي في وقتي..

هو: لا متعلقش, نحب....... تيت تيت تيت 

علقت و قلب يقلي لا, علقت و قلبي يقلو نحبك مع كل كلمة, عفست عليه و  بيديا غفستو و سكتو, و عطيت في وجهو و مرمدتو.. مدام يحب يذلني و  يَكْسرني..

حد منوريه ضعفي كان مخدتي.. حتى مخدتي كان نلقى نحرقها..

يوميات مرى قوية

تابع القراءة »

فرحتهم مش فرحتي

مكنتش نحب نتنازل و تنازلت..

غاضتني أمي و حرقتني دمعتها.. في وجهي تبكي و تلحلح و تقلي خاتر مصلحتك منيش باش ندوملك, خايفة عليا لنموت وحدي لا راجل لا صغار.. تقلي خوف عليا و هو خوف مني و كيما تقول في اللمات الإجتماعية, الطفلة قنبلة تترشق في دار راجلها خير ملي تترشق فوق كتافي.. 

منيش نلوم عليك يامي, لازمني نحبك خاترك  جبتني و ربيتني و  حبيتني بكل همي و مشاكلي.. مطلبتش هذا الكل أما لازمني ندفع حقهم ولاء و طاعة.. حبيتني نعرس هاني عرست و خذيتو راجل كيما حبيت و شتهيت  و عملت عرس سبعة ايام و سبعة ليالي و من صاغات جاوني زوز.. قلي تره هذاكة الكل إلي حبيتوه و محبيتوش و تنازلت و متنازلتوش نجمش يهنيني نهار  مع راجل مطقتوش حتى ليلة ولا حتى ساعة..

الراجل منجمش يسعدني و عرس سبعة أيام و سبعة ليالي مداموش حتى دقيقة كيف دخلنا هاك الغمة إلي سمتوها داري و ذهب ملمّعليش عيني بالفرحة حتى مرة..

يامي, باش نرضيك تنازلت و باش ترضي المجتمع تنازلت عليا..

فرحت و فرحتهم و رْضِيتْ و رَضِيتْ و أني الضحية.. اني الفرحة إلي ضاعت بين الساقين و إنداست تحت الرجلين..

----------------------

"حلي الباب"  

عيطلك من زقاق يديا معبين منجمتش ندق, وحدة تكركر في الفليز و لخرة محملة صغير..

'ولدي'

هكا قالولي في السبطار منعرش كيفاش ولاّ وقتاج جبتو و منيش حستو ولدي, ولد حكاية بلا حب.. زعمة  يتسمى ولدي.. ولد شهوة عابرة مارسناها من غير حب منغير هدف, إشباع رغبة, تولد نتيجتها هو.. نتصور يقعد ولدي..و ولد خطيئة متتغفرش خاتر تنازلت و هبطت خشمي إلي في سما باش نرضي الناس المتمرمغة في الوطى..

باهي توا حلي الباب و إستقبل القنبلة إلي رميتها في دار النسيب باش ترتاح من همها و زفّيتها مڨربطة كيف لهدية باش تفرّح فلان و تغيض فلانة و تسكت علانة و تعمي عين الشامت .. 

هاني جيتك حزينة ڨزينة مكسورة و مثقلة بألف هم... خاتر تنازلت و كسرتلي خشمي بلقمة إلي وكلتهالي و الهدمة إلي لبستوهالي و الكلمة إلي قريتهالي.. و قلتولي بدافع الحب و لازمني ندفع ثمن حبكم ولاء و طاعة..

زعمة خلصت معاكم يامي كيف تنازلت و نزلت لقاع أحلامي و شديت  الذل بيديا.. هاني جيتك و رقبتي محنية و خشمي تهشم و مشى.. 

باش نقعدك في الدار كيف الرزية و شامت باش يزيد يشمت.. و فامهم باش تحل في بلاصة الصاع صاعين.. القنبة ترشقت و باش ترجع ترمي أشلائها في وجهك..  

زعمة باش تفهم توا إلي ميصلحش بيا نتنازل؟؟ و  خشمي ميصلحش يتكسر؟؟ زعمة باش تفهم إلي حبك إلي مطلبتوش ملازمنيش ندفع حقوا من إستقلاليتي و حلمي و كرامتي؟؟ زعمة باش تفهم توا إلي شرفي و حياتي مهيش ملك حتى حد غيري؟؟ و تنسى كلام الناس و تعفس على عقلية مجتمع معوج؟؟؟ 

زعمة يامي باش تفهم ؟؟؟

تابع القراءة »

المثالية عالم مطلوب يسميوه الأفلاطونية

نحكي على عالم ما فيهش برشا ناس 

معبي بالإحساس..

بكل قوتي نحمي فيه

من النفاق

من ناس تكدس في الكذب أكداس

نحمي فيه من الخوف إلي ساكن فيّا 

من القبح إلي يفسد في كل قضية

من السكِينَة إلي تذبح فيّا

من القباحة إلي تحب تستفعل بيّا

عالمي مهوش خيال

اصدق من واقعكم الحاضر في كل مكان 

عالمي حياة مولودة فيّا 

ذايب في كلامي المسموم لكذبكم المرسوم

على حيوط الصدق المنسيّة

عالمي مسروق من حِلمةْ جنيّة

عالمي فكرة مصِرّة متموتش خارج الذكرى

من إصرارها تتولد الثورة

و على جالها تتمرد الإنسانيّة 

منيش نحلم و نحكيلكم على المثالية

نحكيلهم على واقع, على منهج حياة 

نعيش فيه و يحبوا يقتلوه

خوف من رواحهم و نكاية فيك و فيّا

تعبت من عيونك إلي تعمي فيّا

كلامكم إلي يقتل في كلمتي المليانة بيّا

تخنقت من الحياة إلي تفرضوا فيها عليّا

و تمنع فيّا من الحياة الحقيقيّة

التسجيل الصوتي عبر هذا الرابط: https://soundcloud.com/rimanimatrice-1/bpnnvwwzmrsi

تابع القراءة »