نسيان

علاش راجعلها توا بعد منساتك و من مخها نحاتك, خليها تقدم القدام وعلى جرحها تعفس و تتعدى .. نساتك اليوم نعم نساتك مش كيما كنت متصور و تتخيل.. لا حال يدوم و وجيعة لقوية إلي تخليلك قلبك دم هي نفسها تحولُ لحجر.. مستغرب من قسوتها.. إنت إلي صنعتها و حولتها لمرا منغير إحساس.. خليها تقدم القدام مترجعهاش خطوة التالي..

أمان أنا توا وليت خطوة التالي.. حبيتها و مازلت نحبها.. توحشتها.. نحبها ترجعلي و جرحها أنا نداويه و الماضي أنا نمحيه و نسيها فيه..

هههه توا توحشتها بعد عامين عرفت إنك توحشتها بعد مبعتها برخيص و دارت بيك هاك الحية بنت عثمان و إنت درت معاها لا إرادة و لا تفكير كيف الرخيص.. خليتها و هي في اشد الحاجة ليك, ماد يدها و تقرّق بيك.. باش متسيبهاش.. باش متضيعهاش...

لقات كان يدي وقتها جبدتها من قعر الذكريات إلي في بالها بيهم و فيهم حياتها وفات.. لقات كان صدري فيه ترمات و فوقوا بكات...

و تقتلني كيف تسألني "علاش" و تستنى مني إجابة تشفيها.. تقلي علاش خلاني و بدلني بعد مملك قلبي و على كل بلاصة في بدني طبع هاذي ليا و هاذيكة ليا و لهنا منتربع و نسكن و نعيش لين مخلالي منعطي للي بعدُ.. كيفاش باش ننساه و أنا كل بلاصة فيّ تفكرني فيه و كل أحلامي و مستقبلي و حاضري ليه و معاه.. تقتلني باسئلتها هذي..

يزي يا سعاد يزي بالك ماشي في بالك متعبتش و متوحشتش و متعذبتش.. عامين منجمتش نلقى حضن كيف حضنها و قلب كيف قلبها.. تعبت والله منغيرها و عرفت قيمتها و هو فمى كيفها في طيبتها و نظافتها.. عاوني  خليها ترجعلي.. مخليت معملت معاها و هي شادة صحيح قتلي نسيتك و من قلبي نحيتك.. نحب فرصة بركة.. الفرصة لخرة..

أنا في بلاصتها منرجعتش .. بعد عامين راجع!!!!!!! عامين عديتهم معاها نهار بنهار و وجيعة بوجيعة و دمعة بدمعة.. هي تحبط دمعة و أنا معاها نهبطت دمعتين.. دمعة على حالتها و دمعة على قلة حيلتي على وجيعتها.. خليتها و هي متملك كان إنت في دنيا و ظروفها المادية مزمرة و عايلتها في البلاد معادياتها.. خاتر عفست على العادات وإختارتك.. و فوق هذا الكل خسرت صحتها من كثر وجيعتها.. في الصفر حتيتها و في فم ضياع سيبها و لوحوش الشارع سلمت فيها.. على خاتر وحدة معروفة في الحومة كدينار.. من حضن لحضن.. زينها نساك في بنت لوصول..و نساك في العشرة و الماء الملح.. هاك ترا لحال يدوم.. بعد موقفت على ساقيها راجع تبربش في جرح الماضي و ترجع في ذكريات تنسات.. زيد توا راهي نسات و الطفلة إلي عرفتها البارح مهيش نفسها إلي ترا فيها اليوم.. وجيعة غدرتك تولدت بعدها من جديد.. 

مستحيل... مستحيل.. إلي بينتنا ميتنساش...

عندك حق ميتنساش أما مات و تدفن و على قبرُ  تتصدر و تبكي كل متتذكر.. ميتنساش صحيح أما فات و مات و كيما تعرف إلي يموت ميرجعش..  خليها تكمل رحلتها مع النسيان و خليها تلقى إلي يداويها و ينسيها..مترجعهاش التالي بعد السنين..