يتيمة

محلاها.. و تحويق عينها من بكاء عقاب ليل زاد محليها..

محلاها كتلبسلي لسود وقدام عنيا تجي تتغندر ..

و كي ترسم على فمها بسمة و يقعد الحزن و اليأس في عينيها ساكنين..

خطفتلي قلبي من حديث العينين..

يتيم البو مش يتيم و ما يتيم كان يتيم الأم  

و هي يتيمت لثنين..

أُمْ تحت التراب في القلب حية و بوها فوق التراب مدفون..

و هي لاسند في دنيا و لاحبيب يصون.. 

لوجيع كبرتها قبل وقتها و دخلتها للحب منغير قانون..

في عمر العشرة حبتو و بمخ العشرين رمات ثقتها بين يديه..

ماشي في بالها هو الحنان و الأمان إلي تستنى فيه.. 

و هو..

الذيب إلي فيه صاحي و في زنقاتها يصول و يجول

و بسبورو الثقة إلي بين يديه.

المال السايب يعلم السرقة..

و هي قلب و لحم سايب بين ذيوبة..

في ليلة فجرها مطلعش لليوم, بقلبها ضحى و على لحمها تعدى..

و هجرها.. 

و المأساة ردها ثنين..

وجيعة على أم  خلاتها قبل متتفطم من حب الوالدين..

و وجيعة على راجل حطتو في بلاصة الوالدين و بقلبها غدر و على جرحها زاد نزل..

و بوها هايم مزال مفاقش من كف عذرائيل..

خطفلو مرتو و إلي على الهموم تعينْ..

و خلالو أمانة ثقيلة على الكتاف تزيد الهم همين.. 

حبيتها.. ومن اول مرة ريتها...

عينيها تحكي في حكايتها..

و حاجة فيها تقولي  زيد اقرب زيد غيص..

و تقلي أنا إلي تحلم بها..

أنا إلي لهموم دايرة بها تستنى فيك باش توسيها..

حبيتها ننعن والديها و هي إلي حبتني  فيها و ناداتني و من الدنيا الكل خذاتني..

قرُبتْ.. و جرحها حبيت نداوي و قلبها نواسي..

و إلى لمستي لحنينة إستسلمت و في قلبها حبت تسلّم..

أما..

جرححها لقديم مخلهاش.. و ثقتها المغدورة معطاتهاش..

تحب تقرب أما خوفها مخلهاش..

هو محبهاش و غدر و جرح.. و أنا إلي حبيتها و في قلبي خبيتها..

قاعد نخلصت.. أما منيش باش نسلم 

جحرها باش نداوي و  و ثقتها في الرجال باش نرجعها..

منيش باش نسلم فيها ننعن والديها..

نحبها و فيها منيش باش نسلم..

بقلمي على لسان صديقي وسيم

تابع القراءة »

ولادة ثانية..

إسمي ريم بنت سهيل.. سهيل مش إسم عايلتي.. لكنوا إسم راجل علمني نعيش و على يديه تولدت من جديد.. 

سهيل أول نهار ريتو فيه بكيت, الهوى ولاّ عندو طعم جديد كي دخل لصدري وجعني و  محى معاه كل آثار النيكوتين إلي تراكمت عبر السنين قبلُ..

لمتنا ثنية من ثنايات الدنيا بالصدفة, سهيل وراني وجه آخر للدنيا منعرفوش و كنت نجم نعيش و نموت و منشفوش, سهيل للي ميعرفوش هو إنسان قلوبُ صافي و طيب و حنتو و رزانتو مكيفهمش.. لكن كيف برشا من ولادنا اليوم الزهر معندوش و الدنيا معونتوش.. بالعكس ضربتو و كبتو و مساعدتوش.. 

سهيل راجل في وقت الرجلة صعيبة، رجعلي ثقتي في الرجال و قدرتي باش نحلم و نبني و نقدم إلى قدام.. حبني وبرشا و كيما قلي هوا في لحظة سعادة "يا ريتني معرفتكش, كنت هايم عايش ميهمنيش, جات جات مجاتش هانا قاعدين" كعرفني ولا يحلم بالدار و صغار و بمستقبل نظيف و منظم..

سهيل فنان في عنيا و حاجة أنظف من إنها تكون موجودة في عالم كيما عالمنا.. سعات نقرص روحي و نقول ياخي هذا حقيقة ولا نحلم و نهلوس كيما عادتي.. أي اي كان حقيقة كان السند و الحب و عمل إلي منجم يعملو ا حد قبلوا يملالي حياتي و يحط  بصمطوا في كل تركينا في قلبي.. 

تفرقنا.. إي رغم هذا الكل تفرقنا ..

منيش باش نقول مكتوب فرق لقلوب و  لاواقع منَيّلْ عمى لعيون.. سهيل أني مشيت و خليتوا, خاترني ضيعتوا.. في حكايتنا أني لقيت روحي و هو ضيعها.. ضاع و هو يلوج على أرض تلمنا و واقع ميفرقناش ..

بعدت باش نخليه يعيش.. باش يلقى روحوا و يرتاح من مسئليتي..

نغلطوا كي يمشي في بالنا الإنسان يتولد مرة بركة  من بو برةك.. اني تولدت مرتين.. و سهيل راجل يستحق يتربط إسمي بإسمو لآخر عمري.. 

تابع القراءة »

مريم, حكاية اخرى

مريم بنية حشامة و قراية و راسها من القاع متهزوش..  ميولاتها خاصة و زينها صافي لا احمر و لا اخضر و لا لبسة تجلب نظرة رجال الجيعانة.. هكا تظهر من بعيد.. متنجمش تقارنها بالبنات في عمرها  و صعيب تفهمها منيش باش نقول أكبر من عمرها.. إجتروها برشا ها الكلمة.. اما أحلامها و القظايا إلي تحملها اكبر حتى من بدنها.. غرامها لكتب كبير, تاكل فيهم ماكلة, تحل كتاب المات و في وسطوا كتاب لجبران ولا مي زيادة و سعات إبن خلدون  و لا فرويد هذا في عمر صغير حسيلوا تبدى تقرى في الكلام الصعيب و لسان حالها يقول مصعبُ عالم لكبار وقتاش باش نفهموا, إصرارها باش تفهم خلاها تفهم في عمر صغير ,ثورة و رومنسية و تحرير, و على صغر سنها تقول التغيير لازموا ثورة و التحرير لازموا تعليم و محي الجهل و الرمانسية في الأصل حب و حب هو عاطفة محتاجها كل شيء في حياتنا باش ننجحوا.. حتى الماط و الفيزيك محتاج حب..

زميلاتها يراو فيها غريبة في تفكيرها و حتى مناقشتها لاساتذة في القسم تحللهم ببان كبيرة لتفكير.. أولياء صحباتها ميحبوهاش خاتر مجتمعنا الكل يخاف من الافكار الجديدة و يحب عيشت لكهوف و يحب يصنع منا قوالب متشابهة مجرد إختلافك عليهم يقلقهم و يلزهم باش يقمعك..

نتذكر بعض مواقفها المخيفة ليهم, موقفها من الصور المسيئة للرسول محمد.. قالتهم كل إنسان حر في تعبير على رأيُ و ربي كفيل أنُ يحمي روحو و نبيُ علاش نحنا منخليو منقولوا في دياناتهم و نكفروا و نوصفوها إنها محرفة, نحن زادة نتسماو نمسولهم من عقايدهم... هذا موقف نرفز الاستاذ و حتى زميلها المتدين إلي إلتوا ميكلمهاش..  إيمانها بحرية التعبير كان كبير على صغر سنها و كثرت لقيود تقتل فيها.. في دار سيف يقصلها في لسانها كل ميطوال و يولي يعببر برشا و يتكلم و سيف في الشارع إسم الخوف و نظرية المشيان تحت الحط تلاحق فيها و عرف المجتمع يجلد فيها.. و هي مجرد مراهقة تفكر و الفرق الكبير بين الكتب و واقع يزيد في غربتها و ضيعتها..

مريم كانت الحكمة إلي يلوجوا عليها صحباتها لكل و العاطفة لكبيرة.. إلي تجي تاخوا في رايها في حب حياتها  و لخرة تحبها تقلها شنوة تعمل مع صاحبها باش يحبها و وحدة تحكيلها على مشكلتها مع عايلتها و هي تلوج في حلول لناس الكل.. أما شكون يلقى حل لمشكلتها و يونسها في غربتها و يعاونها باش تقاوم إلي يجلد في افكارها و يقتل في تفردها..

مريم غربتها وسط ناسها صنعت منها مرا مستقلة و حبها للحرية صنع منها فكر مياقفش و حب ميفاش

..

مريم اليوم فاتت العشرين.. و قُربت لثلاثين  و مزالت هي كيما هي و بالك لهبال زاد بيها شوية.. ريتها في المغازة و اني نقضي في قضية الشهر و ولادي يجريو قدامي..  وقفتلي و سلمت عليا بالبوس و تعنيق و قتلي الدنيا قداش عبثت بنا و ثناياها دوختنا و قتلي إلي هي اليوم تعمل في رسالة الدكتراه و تحضر في كتاب باش يهبط لدور النشر على قريب إسموا "المرأة في بحثها عن عدالة الإلاه" سئلتها على العرس و ريت على وجها تبسيمة غريبة كينها تقلي أنا فين و إنت فين هههه.. بصراحة حسيت روحي تافهة هي تحكلي كيفاش تبني في روحها و تسعى باش تاسس لفكر جديد و تعيش و تحب تتعلم و تعلم و تعمل وحدها ثورة في مجتمع ميت و مريض☻ ..  لقفت روحي و قتلها اش ربحنا منهم الرجاال كان تعب و خطوة التالي ليس القدام و غزرت لصغاري و في قلبي نقول كيفاش اش ربحنا منهم الرجال سند في الدنيا و أمومة و صغاري بالدنيا و مفيها.. 

مريم إختارت ثنيتها و اني إخترت و في بلادنا ثنيتي و ثنية مريم متتقابلش...

تابع القراءة »

نسيان

علاش راجعلها توا بعد منساتك و من مخها نحاتك, خليها تقدم القدام وعلى جرحها تعفس و تتعدى .. نساتك اليوم نعم نساتك مش كيما كنت متصور و تتخيل.. لا حال يدوم و وجيعة لقوية إلي تخليلك قلبك دم هي نفسها تحولُ لحجر.. مستغرب من قسوتها.. إنت إلي صنعتها و حولتها لمرا منغير إحساس.. خليها تقدم القدام مترجعهاش خطوة التالي..

أمان أنا توا وليت خطوة التالي.. حبيتها و مازلت نحبها.. توحشتها.. نحبها ترجعلي و جرحها أنا نداويه و الماضي أنا نمحيه و نسيها فيه..

هههه توا توحشتها بعد عامين عرفت إنك توحشتها بعد مبعتها برخيص و دارت بيك هاك الحية بنت عثمان و إنت درت معاها لا إرادة و لا تفكير كيف الرخيص.. خليتها و هي في اشد الحاجة ليك, ماد يدها و تقرّق بيك.. باش متسيبهاش.. باش متضيعهاش...

لقات كان يدي وقتها جبدتها من قعر الذكريات إلي في بالها بيهم و فيهم حياتها وفات.. لقات كان صدري فيه ترمات و فوقوا بكات...

و تقتلني كيف تسألني "علاش" و تستنى مني إجابة تشفيها.. تقلي علاش خلاني و بدلني بعد مملك قلبي و على كل بلاصة في بدني طبع هاذي ليا و هاذيكة ليا و لهنا منتربع و نسكن و نعيش لين مخلالي منعطي للي بعدُ.. كيفاش باش ننساه و أنا كل بلاصة فيّ تفكرني فيه و كل أحلامي و مستقبلي و حاضري ليه و معاه.. تقتلني باسئلتها هذي..

يزي يا سعاد يزي بالك ماشي في بالك متعبتش و متوحشتش و متعذبتش.. عامين منجمتش نلقى حضن كيف حضنها و قلب كيف قلبها.. تعبت والله منغيرها و عرفت قيمتها و هو فمى كيفها في طيبتها و نظافتها.. عاوني  خليها ترجعلي.. مخليت معملت معاها و هي شادة صحيح قتلي نسيتك و من قلبي نحيتك.. نحب فرصة بركة.. الفرصة لخرة..

أنا في بلاصتها منرجعتش .. بعد عامين راجع!!!!!!! عامين عديتهم معاها نهار بنهار و وجيعة بوجيعة و دمعة بدمعة.. هي تحبط دمعة و أنا معاها نهبطت دمعتين.. دمعة على حالتها و دمعة على قلة حيلتي على وجيعتها.. خليتها و هي متملك كان إنت في دنيا و ظروفها المادية مزمرة و عايلتها في البلاد معادياتها.. خاتر عفست على العادات وإختارتك.. و فوق هذا الكل خسرت صحتها من كثر وجيعتها.. في الصفر حتيتها و في فم ضياع سيبها و لوحوش الشارع سلمت فيها.. على خاتر وحدة معروفة في الحومة كدينار.. من حضن لحضن.. زينها نساك في بنت لوصول..و نساك في العشرة و الماء الملح.. هاك ترا لحال يدوم.. بعد موقفت على ساقيها راجع تبربش في جرح الماضي و ترجع في ذكريات تنسات.. زيد توا راهي نسات و الطفلة إلي عرفتها البارح مهيش نفسها إلي ترا فيها اليوم.. وجيعة غدرتك تولدت بعدها من جديد.. 

مستحيل... مستحيل.. إلي بينتنا ميتنساش...

عندك حق ميتنساش أما مات و تدفن و على قبرُ  تتصدر و تبكي كل متتذكر.. ميتنساش صحيح أما فات و مات و كيما تعرف إلي يموت ميرجعش..  خليها تكمل رحلتها مع النسيان و خليها تلقى إلي يداويها و ينسيها..مترجعهاش التالي بعد السنين..

تابع القراءة »

نحب و نحب و نحب..

سيبني اخطاني, نحب نتنفس, نحب نعيش..

نحب نحلم و نخمم و نلون سما حياتي كيما نحب..

نحب نحي النقاب إلي حطو قدامي و نرى دنيا كما نحب,

متمنعنيش نولي كيفك و بالك خير منك.. 

خليني نقدم بيك و معاك..

تحميني و ناقف معاك.. 

خليني نهدم و نبني من جديد.. 

متقليش متحلمش متخممش متفكرش..

متقليش متنجش..

نجم إييه نجم مدام نحب.. 

متسكتنيش و تقتليش صوتي و فوق قبرُ تعيش..

متهمشنيش و تحاول بضعفي تقوى..

ضعفي ميقويش..

و تقزيمي ميطولكش و ميزيدكش..

خليني نحلم.. نحب نحلم..

و في خيالي نبدى نصور و بيديا في الواقع نحاول نبني..

متقمعنيش باجاه ولديك حلمي متقتليش.. 

تعبت و فديت..

أنا نبني و نشيد و إنت بكلمة تهدم و تغرقني في الردم..

تقضي على كل منملك من أمل.. 

إلي كل من يقول لي لن تستطيع تغيير العالم: ساحاول و لإن لم استطع  يكفيني أن أعيش و أموت حرة ولا أورث أبنائي عبوديتي..

تابع القراءة »